АДВОКАТЛИК ТУЗИЛМАЛАРИНИНГ СТАТИСТИК МАЪЛУМОТЛАР ШАКЛЛАРИНИ ТАСДИҚЛАШ ҲАҚИДА
[Ўзбекистон Республикаси Адлия вазирлиги томонидан 2018 йил 5 январда рўйхатдан ўтказилди, рўйхат рақами 2960]
Ўзбекистон Республикаси Президентининг 2011 йил 23 августдаги ПҚ-1602-сон қарори билан тасдиқланган Ўзбекистон Республикаси Адлия вазирлиги тўғрисидаги низомга ва Вазирлар Маҳкамасининг 2009 йил 9 мартдаги 60-сон қарори билан тасдиқланган Адвокатлик тузилмаларини давлат рўйхатидан ўтказиш (ҳисобга олиш) тўғрисидаги низомга асосан буюраман:
1. Ўзбекистон Республикаси Адвокатлар палатасининг адвокатлик тузилмаларининг статистик маълумотлар шаклларини 1-иловага мувофиқ тасдиқлаш тўғрисидаги таклифи қабул қилинсин.
2. Қуйидагилар: тасдиқланган статистик маълумотлар шакллари адвокатлар томонидан тақдим этилган маълумотлар асосида тўлдирилиши;
ҳар йили 10 январгача — ўтган йилдаги ўз фаолияти тўғрисидаги статистик маълумотлар Ўзбекистон Республикаси Адвокатлар палатасининг тегишли ҳудудий бошқармасига тақдим қилиниши (йиллик);
статистик маълумотларнинг тўғрилиги ва тўлиқлиги учун жавобгарлик адвокатлик тузилмасининг раҳбари ва тегишли адвокатга, уларнинг Ўзбекистон Республикаси Адвокатлар палатасининг ҳудудий бошқармасига тақдим қилиниши учун жавобгарлик адвокатлик тузилмасининг раҳбарига юкланиши маъқуллансин.
3. Белгилаб қўйилсинки, адвокатлик тузилмалари статистик маълумотлар шаклларини электрон рақамли имзо билан тасдиқлаган ҳолда Ўзбекистон Республикаси Адвокатлар палатасининг расмий сайти орқали тақдим этадилар.
4. Мазкур буйруқ кучга кирган кундан эътиборан айрим идоравий норматив-ҳуқуқий ҳужжатлар 2-иловага мувофиқ ўз кучини йўқотган деб топилсин.
5. Мазкур буйруқ давлат рўйхатидан ўтказилсин ва бу ҳақда Идоравий норматив-ҳуқуқий ҳужжатларни давлат рўйхатидан ўтказиш бошқармаси Идоравий норматив-ҳуқуқий ҳужжатларнинг давлат реестрига тегишли ёзув киритсин.
6. Нотариат, ФҲДЁ ва адвокатура бошқармаси ҳамда Ҳуқуқий тарғибот ва ахборот бошқармаси ушбу идоравий норматив-ҳуқуқий ҳужжатни барча манфаатдор шахсларга етказилиши ва «Ўзбекистон Республикаси қонун ҳужжатлари тўплами» — «Собрание законодательства Республики Узбекистан»да ҳамда Ўзбекистон Республикаси Қонун ҳужжатлари маълумотлари миллий базасида эълон қилинишини таъминласин.
7. Мазкур буйруқ 2018 йил 10 январдан кучга киради.
8. Ушбу буйруқнинг ижросини назорат қилиш вазир ўринбосари М. Истамов зиммасига юклансин.
Вазир Р. ДАВЛЕТОВ
